Login     Sign Up
Tugadar (@admin)
23 days ago
24 Views

All di political parties for Nigeria don finish dia primary elections as na Thursday 9 June 2022 di INEC deadline for completion of primaries and submission of presidential candidates go expire.

On Wednesday ruling All Progress Congress conclude dia own for Abuja wia Asiwaju Bola Tinubu emerge as winner.

While main opposition People’s Democratic Party wey hold dia own last week announce Atiku Abubakar as dia flagbearer for di 2023 elections.

Oda parties like Labour, New Nigeria Peoples Party, Young Progressive Party and Africa Action Congress don all conclude dia conventions and announce dia presidential candidates.

Dis na di list of all di presidential candidates so far for Nigeria after di completion of party primaries.

Prince Malik Ado-Ibrahim (YPP)

Prince Malik emerge as di presidential candidate for Young Progressive Party after dia convention wey hold on Wednesday.

According to im profile on Wikipedia di Kogi state prince and son of Ohinoyi of Ebiraland na billionaire wey energy company Bicernegy and also founder of Formula One team Arrows A20.

For 2020 tori of im marriage to billionaire daughter Adama Indimi grab serious attention at di time.

Rabiu Musa Kwankwaso (NNPP)

Di New Nigeria Peoples Party hold dia own covention inside Moshood Abiola stadium for Abuja wia dem announce former Kano state govnor Rabiu Kwankwaso as dia flagbearer for next year presidential elections.

Di two term govnor also serve as senator after e leave office between 2015-2019 and not long ago serve as minister of defence under Olusegun Obasanjo presidency.

2023 go be di third time wey Kwankwaso go dey seek Nigeria’s highest office but di oda two attempts end for primaries.

Omoyele Sowore (AAC)

Africa Action Congress hold dia own convention since last month wia founder and publisher of Sahara Reporters Omoyele Sowore emerge as dia presidential candidate.

Dis go be di second time wey Sowore go run for presidential election after also running in 2019.

Di publisher/activist bin chop arrest few years ago unto Revolution Now protest wey e bin wan organise across Nigeria.

Peter Obi (LP)

Former govnor of Anambra state for southeastern Nigeria Peter Obi na im become flagbearer when Labour Party hold dia convention for Asaba Delta state last month.

Former aspirant himself Professor Pat Utomi step down for Obi wia e also tok say Obi deserve to get chance to govern Nigeria.

Dis na di second time wey di two term govnor go dey ontop presidential ticket since e serve as running mate to Atiku Abubakar of di PDP for 2019 elections, na dia party come second.

Prince Adewole Adebayo (SDP)

Di Social Democratic Party announce Prince Adebayo as dia flagbearer after dia primary election wey hold on Wednesday for Abuja.

Di lawyer and founder of KAFTAN Television defeat di only female presidential aspirant for Nigeria Khadija Lamidi to emerge winner.

Di Prince say na di turn of Nigerian masses to lead di kontri and e go visit every corner to campaign to become next Nigerian president.

Kola Abiola ( PRP)

Eldest son of late business tycoon Moshood Abiola, Kola, na im win primaries wey Peoples Redemption Party hold for Abuja to emerge as dia presidential candidate for next year.

Kola just like im father dey into business and e defeat former MD of Bank of di North Falalu Bello to grab di presidential ticket on Sunday.

Dis no be di first time wey Kola go dabble into politics as e don happun before but di 59 year old go dey hope say e fit win dis time around.

Asiwaju Bola Tinubu (APC)

For dia convention wey hold for Eagles Square inside Abuja All Progressive Congress announce former Lagos state govnor Asiwaju Tinubu as dia candidate for next year presidential elections.

Di two term govnor wey bin also serve as senator during di brief third republic for Nigeria.

Na im party dey currently in office so dat one make dem di party to beat.

Atiku Abubakar (PDP)

Former Nigeria Vice President Atiku Abubakar emerge winner for Peoples Democratic Party primaries wey hold last week for Abuja defeating likes of strong contender Nyeson Wike.

2023 go be di sixth time wey Atiku go seek to become Nigeria president after first showing interest for 1993 even though e no get im party ticket at di time.

Di Adamawa state born businessman contest general elections for 2007, 2011 and 2019 elections.

Hamza Al- Mustapha (AA)

Dis na former chief security officer to late head of state General Sani Abacha and na im win di presidential ticket to represent Action Alliance for next year election.

Al-Mustapha wey serve over 10 years for jail after di death of Abacha defeat im only opponent Samson Odupitan on Thursday wey be di last day for primaries ro emerge winner.

Di retired Major from Yobe state don contest for Nigeria presidency before but go dey hope say dis time around go beta pass last time.

Professor Christopher Imumulen (AP)

Dis professor of Engineering na im get di nomination for Accord Party after delegates on Saturday vote am for dia convention.

Di 39 year old begin im career as a gas plant engineer for BOC Gases Nigeria Limited for 2005.

Professor Christopher according to im profile get two Phd degrees for Engineering research and Educational Management.

Dumebi Kachikwu (ADC)

Di emergence of dis founder of Roots Television as di presidential candidate for African Democratic Congress make headlines as e defeat favourite for di ticket Kingsley Moghalu to emerge.

Mr Kachikwu get 978 votes to defeat former Central Bank deputy govnor Moghalu and odas for dia primaries wey hold for Ogun state on Thursday.

Yusuf Mamman Dan Talle (Allied Peoples Movement)

Allied Peoples Movement (APM) do dia own convention inside dia office for capital of Nigeria Abuja and na dia chairmo Yusuf Mamman emerge as dia candidate.

To start with, na only him show interest and oda party members agree to allow di Almat Farms owner di chance to represent dem as presidential candidate for 2023.

Peter Umeadi (APGA)

Former chief judge of Anambra state Peter Umeadi na im get di nod from All Progressive Grand Alliance (APGA) to battle for dem in next year presidential election.

Na only Mr Peter show interest and all oda party members agree to allow am contest for Nigeria presidency for 2023.

Okudili Anyajike (NRM)

Mr Okudili na im emerge winner from di primaries wey National Rescue Movement do last week for Abuja.

Di businessman poll 180 votes to defeat im closest rival Professor Benedicta Egbo wey get 30 votes.

More updates are on the way.

#News